اتكلمنا على موضوع مواقع العمل من المنزل ومن أهمهم ابورك Upwork (اقرا تفاصيل المواقع الموثوقة من المنزل من هنا اضغط هنا) لكن فى مشكلة بتقابل معظم المستخدمين فى بداية عملهم، وهي موضوع عدم قدرتهم على الحصول علي اول وظيفة لان العميل شايفهم جداد فبيرفض يديهم شغل ودي معضلة بصراحة طب حيبقى عندي هيستوري ازاي وانا محدش راضي يديني شغل
دي بعض النصائج المجربة حتي لو اختلفت مع كلام كتير سائد وادعو اي حد لسه تجربة انه يفيد الناس بيها هنا
والكلام ده بناء علي خبرتي كعميل كمان فى الموقع في نفس الوقت فبرده حتكلم ايه اللى بعمله لما بختار موظف علشان تفهم العميل بيفكر ازاي
فترة الحصول على عمل:
1- الموقع مش متشبع ولا حاجة انت عايزة وظيفة واحدة بس مش الف وظيفة فاكيد حتلاقيها ودي اهم نقطة تحطها فى دماغك لانك لو زهقت ويأست حتسيب الموقع بسرعة
2-الطبيعي انك ممكن تاخد شهرين تلاتة متلاقيش وظيفة فى الاول، مع التقديم يوميا او متابعة طول اليوم علشان تلاقي وظيفة كويسة
-حتقولي الكونيكت اللى بقدم بيعا بفلوس وحيضيعوا عليا، دي مصاريف كده زي مانت بتروح تشتري بدلة علشان تروح بيها الانترفيو مش حتقول لا مش حجيب علشان متكلفش فلوس، فاشتري كونيكت كتير ومتبقاش (بخيل) الكونيكت مش حتجيب جنيه ونص يعني فاعمل حسابك مثلا فى 200 ولا 300 جنيه فى الاول ومتقلقش مع اول وظيفة حتعوضهم
ازاي تظبط بروفايل Upwork
اكتر من 90% فى المية بيقولوا البروفايل بتاعي ممتاز ومحدش بيشغلني، انا اسف معظم الوقت بيكون البروفايل ضايع والانجليزي غريب ومش مفهوم فده بيقفل العميل منك، فياريت حضرتك تعمل خطوة بسيطة تدخل تشوف المنافسين فى مجالك وتشوف البروفايل وتظبط زيه تقدر تشوف المنافسين من هنا
https://www.upwork.com/hire/
ازاي تعمل كوفر ليتر Cover Letter ناجح Upwork:
-ظبطت البروفايل وحطيت كل حاجة؟ ناقص الكوفر ليتر Cover Letter اللى بتقدم بيه وده اللى العميل بيشوفه لما تقدم
وده مش بالكترة زي مانت فاهم انا مش حقعد اقرا رغي كتير، ابدا على طول من غير انا شوفت الوظيفة وعجبتني وحسيت انها وظيفة احلام ويشرفني…الخ
كل الكلام ده ملوش لازمة، انا بقول:
Dear sir I have more than ** years of experience in وتكتب المجال وتكتب لو بتجيد مهارات او لغات برمجة معينة مرتبطة بالمشروع، كل ده فى حدود سطر ونص
وبعدها تبدا تتكلم على مشروع العميل نفسه وميبقاش كلام عام، لكن كلام علي مشروعه نفسه بتفاصيل مثلا لو برمجة تقول انا شايف اننا نستخدم لغة كذا ونعمل كذا بحيث انه يبقى شبه برنامج مشهور مماثل
كده بدات تلفت انتباهه، وتساله سؤال فى المشروع بتاعه زي مثلا هل السيرفر بتاعك يستحمل كذا ولا حنلاقي طريقة تانية، الخ المهم انك تكلمه على مشروع اكتر وتقدر تعمل ايه علشان تخليه يبقى عايز يرد عليك.
كل ده باختصار وبلغة سليمة 100% طبعا
طبعا لو عملت شغل مشابه سابقا حط للعميل لينك ليها علشان يشوفها
في طريقة بس معقدة شوية انك تعمل اكونت عميل وتطرح وظيفة في نفس المجال الخاص بك وتشوف التوب ريتد المحترفين اللى بيقدموا بيكتبوا ايه، بس بستحرم الطريقة دي دلوقتي لان الكونيتكتس بقي بفلوس وان كان ممكن تتفرج وبعدين تعمل كانسيل فحيرجعلهم الكونيكتس تاني.
حنكمل فى الجزء التاني من الموضوع بقية النصائج المهمة علشان تاخد وظيفة بسرعة فى ابورك وتقدر تكمل فى المجال ده. اضغط هنا لقراءة الجزء الثاني من.
